دارميات
مالي صبر ضليت
ليلي ونهاري
اعتب على العدال
حاير واداري
**
مرن طيور اثنين
وانت على بالي
يتماوج ويه الريح
طيفك ياغالي
***
لو ردت عني تروح
خلني على بالك
بلجي الزمان يعود
واحظى بوصالك
**
يالماشي الله وياك
لحظه تأنه
اسمع كلامي وروح
شوكك جتلنه
***
كلما يغني الطير
اذكر حجاياك
ملهوفه بيك الروح
تترجه ملكاك
**
جم دوب اضل ملهوف
واكعد بدربه
لاحن علية وفات لا
انكسر قلبه
**
انا الذي بهواك
روحي اتلفتها
شنهو السبب صديت
عنها وعفتها
***
مثل البدرويزود
خدك ياناهي
يرمي عليه اسهام
طرفك ياساهي
****
غيرك فلا حبيت يل
ماتحبني
ماحاسب ابهال
الحال يسمر تذبني
***
هذا الهوى من هواي
حيل ارد اشمه
بلجن يمر بجروح
قلبي ويلمه
***
هاك ابره هاك
الخيط خويه ارد اكلفك
ومشكك الدلال شله
على عرفك
***
هاك ابرتك هاك
الخيط كوم امش عني
لوبيه اشل جروح
جان اشل ذني
****
يعيوني شبعن شوف باجر
يبينون
ازرع ورد وشموع
لمن يعودون
***
ولفي وخاف عليه من
حسدة العين
هاك اخذ هاك الروح
وعيوني الاثنين
**
شلون القلب يسلاك
وانت النبع بيه
وانت النسيم الهاب
من يقبل عليه
***
لسهر واعد انجوم
نجمه على نجمه
قلب الخلي ينام
قلبي شينيمه
**
مر بيه يالمحبوب
خفف عذابي
من فرقتك لليوم
دمعي شرابي
**
مالي قلوب اثنين
خو تدري بيه
واحد واخذته وياك
وشظل اليه
**
انه بحلاة النوم
شفتك حبيبي
صحت بحلاة الروح
يالوعه غيبي
***
حسدوني كل الناس
شلهم عليه
اضحك جذب والنار
تلتهب بيه
***
حسبوا عذاب الروح
جنة نعيمي
مادروا دمع العين
صاير نديمي
***
عفيه قلب مايلين
من يسمع بجاي
لو من صخر هم جان
لان وغده ماي
**
كل يوم اقول اليوم
باجر يبينون
ونطي للمبشرين بوسه من العيون
**
عونه الي ينام
الليل خالي من الهموم
يطرن حجايه هواه
عد لذة النوم
***
بين الجرف والماي
حنطه ازرعوني
لاكالو الله وياك
لاودعوني
**
كل البلام تفوت
عيني على بلمه
ومن الهوى والروج
ربي يسلمه
***
ريت الوصال يدوم
ليلي ونهاري
واللي سعى بفرقاك
يسعر بناري
**
اهلا وسهلا بيك
واكثر بالوياك
القلب قبل العين
فز وتلكاك
**
سلم ولو بالعين
تكفي الاشاره
روحي ابتلت بهواك
سويلي جاره
***
اردانشد الماشين
احبابي واعداي
شالسبب هرشي يموت
واصله بوسط ماي
**
يالتنشد الماشين
احبابي واعداي
هرشك نحر صدماك مو
كصده الماي
***
جيتك غفل ياهواي
تضحك لكيتك
حسبالي تحزن دوم
من فاركيتك
***
دكم سترتك زين
لاعاد اشتم
بالسوق الك عدوان
جم دوب اعلم
***
ارد اصرخ واصيح
بصوت بويه بويه
من عكب عشر سنين
وتكلي خويه
***
اوكف ولو زعلان
كلمه اريد احاجيك
ياما بجيت عليك
هسه اريد ابجيك
***
كلهم سداير سود فد
انت نيلي
اني الزم الشباج
وانت اندعيلي
**
مرخص لك على عضاي
تسحك عليها
بس بالك على الروح
جي انت بيها
***
رديت اعد انجوم
وايدي على خدي
هم قهر هم افراك
هم اني وحدي
**
الدهر لو وازاك
هابالك اتصيح
ارجي الرمح بجلاك
واصبر لما اتطيح
***
حرموا حتى الصوت
بسمك فلا اصيح
دمعتي بطرف العين
بس ارمش اتطيح
***
شفت الضوه من بعيد
قلت احتركنه
لمن وصلت البيت لن
ولفي عدنا
***
عاالهجر من دلاك
موجنت احبك
واشعل عيوني شموع
تضوي على دربك
***
ياحلوه ييزج عاد
هجرج لواني
تقابلتوا على
الجويات انت وزماني
***
ياربي يامعبود
صفيلي قلبه
بالغالي كام يبيع
من شاف احبه
***
بدمي ودموع العين
ساجيته عودك
الشيب الطلع
بالراس كله على مودك
***
جا وين ذاك الكال
الخوة للضيج
مرت علي ايام تنشف
الريج
***
بطلت ماكولش من
جرحي احاه
جي دورت ولكيت عد
شامت ادواه
**
ياحية يام راسين
طيحي بجدرهم
سميلي اهل البيت
بس خلي ابنهم
***
النار اصيح النار
وصلت لهاماي
مامش صديج اصحيح
ويبخها لي بماي
**
بت بعد الدلال
جاهل يعت بيه
يبجي من اصيح عليه
كطعة من اخليه
**
بت بعد بالدلال
وموسرة بيدي
بسج ونين الليل
ياروحي هيدي
**
متعجبه النسوان
تطلق فرد يوم
وانه طلوقي
بالساعات كل ساعه اذب توم
**
خدك لمع ياهواي
واضوى على بغداد
متمعن ربك بيك
وبخلقتك جاد
شوخاله ملتمات
كلجن على هواي
جبته برشيح العين
ومراجف جلاي
***
كالولي بالهجران
يرجع حبيبك
لو مارجع لاتلوم
هذا نصيبك
**
بس بالخيال وياي
ولفي عرفني
من اصحى شو زعلان
عني ويغثني
**
ارد اشلع الدلال
لهواي اوديه
وبعينه خله يشوف
بهجره شعمل
**
الدهر كص يمناي شل
يسرتي البين
بيش الزم الدلال
بيش امسح العين
**
كون القلب بيه باب
ينطر واراويه
جا قتلي عفيه عليك
دم ولحم بيه
**
والحرم واهل البيت
والحج والحرام
انسى الله كون
انساك وابرى من الاسلام
**
ريت الله لاينطيك
يالصحت باسمه
فز فزة الملهوف
قلبي شيلزمه
**
والبيدي والبكاع
والعلى متوني
مانكر وداد هواي
لو كطعوني
**
كتلها تتحنين
بجفاج اليه
كالت مسحت العين
واثر بديه
**
بين الجرف والماي
حنطه زرعوني
لاكالو الله وياك
لا ودعوني
**
ساسك رمل هيال من
ياشريعه
وللرايح وللجاي
سرك تبيعه
**
حملتو ياهلي بليل
والولف غافي
اسهر وخله ينام
نوم العوافي
**
كل مااريد انساك
باسمك يصيحون
وتحمس الدلال وتهل
العيون
**
بسكوت اون بسكوت
ماورج احد
فاضحني دمع العين
يسجب على الخد
**
ليش التريده الروح
شوفته بعيده
ومخاطف ويه العين
الماتريده
***
الارض كلها ارواح
خفف مشيتك
حتى على الميتين
عمت اذيتك
***
للدرب ماهميت
هماني ملقاك
ريت الزمان يعود
واتعاتب وياك
بسك ولك ياالبين
دقاتك وياي
تطكني وكت الضيج
وتشمت اعداي
**
كون اليموت هواه
يندفن يمه
سكته بتوالي الليل
يكعد ويشمه
**
يايمه من ونيت
كتلج تعالي
حسبالي اتحنين من
شفتي حالي
**
تتخطه بالفستان
شوفي النجيبه
خلت شخط بالكاع
بطرف القصيبه
**
خل روحك بعز دوم
بالك تذلها
لاتطلب الحاجات
الا من اهلها
***
تسالني علتي منين
وانت سببها
كتبه عليه هاي ربك
كتبها
**
اهلا وسهلا بيك
يالجنت غايب
وقليبي من فرقاك
ضاق المصايب
**
علو تخت حبي يااهل
الكهاوي
وشوكع الفنجان منك
ياغاوي
**
كل لحظه امر عليك
بلكت اشوفك
لوشكو ايد بايد
ماقدر اعوفك
**
سنين اتاني هواي
غير المجبلات
بالكصه لاح الشيب
والله والبزر فات
**
خليني ياهواي
للنجم راعي
عينك تشوف النوم
لو مثلي واعي
**
لا ارضى عني تقوم
لا ارضى تقعد
لا ارضى جاري تصير
ولا ارضى تبعد
**
جيبولي النمام خل
يكعد وياي
ذم لومدح مقبول بس
طاري هواي
**
ياروحي نص الليل
ها شو كعدتي
حقج ماالوم عليج
يمكن ذكرتي
**
صد ليه واختليت
عينه شكبرها
ماادري رضا لوغيض
معرف فسرها
**
لحد يلوم الروح
وانه ادرى بيها
تقلي اريد اهواي
بيش اندعيها
**
يالهانت روحي عليك
ريض لشوفك
لابيه اصدن ليك لا
بيه اعوفك
**
كون العزيز ايصير
دشداشه ليه
وان قمت وان قعديت
لايق عليه
كون العزيز يصير
ترجيه بأذني
وان قمت وان قعديت
بالخد يحبني
***
ربي استر على
اهواي من ممشى الغروب
جاهل واخاف عليه
مو ساحق ادروب
**
عندي وتخاف عليك
واتدورك امك
موش بسواد العين
بصبيها اضمك
***
جنك سمار اهواي
خويه التفت جاي
واتعرض اليمشون من
ناري الوياي
***
اشلون الك رجلين
اشلون الك روح
تجفي وتخلي اهواك
بفراشه مطروح
**
برد الصبح قرصات
لفني بعباتك
وبساعة الشيطان
انت وذاتك
***
يايمه لاشورين
شورج مااريده
الهملي صم اتراب
واتوسد ايده
**
من مر عليه هواي
صابتني حيره
سلمت مدري عليه
مادري على غيره
***
اني من اشوف اهواي
مجبل عليه
حيلي يكع للكاع
واتموت اديه
***
شتحمل ياهل الدلال
ريت الله يبلاك
وانت بنزاع الموت
وتحن على هواك
***
تبجي على العافوك
ياقلب مالك
لا ياسفيه الراي
خاوو بدالك
***
نجمة فجر ياهواي
وانزل على اغطاك
وبحجة البردان
اتلفف وياك
***
اش ولك يالدلال
بطل ونينك
كلها اصبحت عدوان
محد يعينك
**
خويه لاتظن فرقاك
هين عليه
كل ضلع صارت بيه مية
شجيه
**
شفت البدر ياهواي
لبالي انت
صار اشتباه وياي
عقلي انت اخذته
**
ليش من اشوف اهواي
يتغير اللون
والدنيا صفره
اتصير ويتماوج الكون
***
لو ماخاف الناس
تتحاجه بيه
لصبح ارض لهواي
يسحق عليه
**
ياروحي لاتميلين
للنذل بالج
راح بعد ماجاه
اللي يشجي حالج
***
ياقلبي ون بهداي
لاتسمع اعداي
اصبر واسلي الروح
لمن يجي اهواي
***
لازم امر بالدار
والطم على الراس
اتعب واصيح الغوث
وتردني الناس
***
اسود لبستي ليش
مات التحبينه
لو صار الحزن موديل ويعجبج تلبسينه
**
اه امداها الروح
اه امداها
تمشي وره اليمشون
اللي جانو وراها
**
بالك تقول احاه
ياخويه بالك
كل التريده ايصير
روحي بدالك
***
اهلي بحكم فرعون
حكموا عليه
متقلي يامدلول
شطايح بديه
والله يمر ذكراك
صبح ومسيه
اه وشكثر حسبات
يطرن عليه
**
ياقلب هيد ونام
لكعد وجويك
هم وتعب وفراق كلي
شيظل بيك
**
ياشقره خشنه الكاع
امشي على عيني
وافديلج الرضعان
ومقربيني
**
العقل ويه الروح
مني اسلبتهن
نجوم الظهر بجفاك
يااسمر شفتهن
**
لو ادري هيجي
ايصير ماعاشرتهم
ماضكت طعم النوم
من فاركتهم
**
من الزمن مااريد
غير اعرف اشبيه
واكثر بعد ياهواي
يكشف اليخفيه
**
ياولفي بس بالنوم
نتلاقه طيفين
سوي عليه احسان خل
تغمض العينين
***
يادار المحبين
خضره ارد اسويج
لو جف عليج الماي
بدموعي اساجيج
**
هلهل ياشامت حيل
خل يسمعونك
عقلي ووليفي راح
قرة عيونك
**
روح الله لا وياك
يالعفت الاحباب
القلب من فرقاك
خزن ولا طاب
***
روحي حمامة شوق
خليها يمك
تفز واتطير وياك
لو سمعت اسمك
***
يالسافرت لبعيد
يمته تجينه
قلبي شكثر يهواك
يكثر حنينه
***
يالرايح على الدار
هاك اخذ العيون
بلجن تشوف هناك
اهلي اللي يحنون
***
ظل ابجي طول الليل
ابدا ماهزك
لو جنت ابن اهواي
جان اشمعزك
**
هم انت مثل العين
ماقدر لج انهاج
شو كلج اكبين من
يقبل اهواج
**
من عفج لآل ابدير
جبت الله اطف بيه
لو لا العرد
والشوج جان انه كاضيه
***
مالي قلوب اثنين
خو تدري بيه
واحد واخذته وياك
وشظل اليه
**
مالي عتب وياك ويه
نصيبي
شمتت بيه اعداي لا
ياحبيبي
يايمه شيلي الزاد
بالهم تعشيت
جابولي طاري اهواي
بالزبده غصيت
**
اشلون انام الليل
وانت على بالي
حتى السمج بالماي
يبجي على حالي
**
ياروحي لاتبخلين
زيدي بونينج
حملج وكع بالكاع
محد يعينج
**
يالجبت طاري اهواي
تيهت شوري
خدرت بالفانوس
حسبالي قوري
***
كل اليحب مينام لن
قلبه مالوم
وعيونه شبعانات من
كثر الهموم
**
عيوني خوش عيون
وانعمل بيهن
ودواهن المحبوب
وابعد عليهن
القلب هنته ونام
شينيم العيون
مابجت مثل ابجاي
ليله على مجنون
**
بالنزل ماليش اني
اجنبيه
ياجسم خلنه انشيل
للناصريه
***
غربت ردت الزود
طحت بنكيصه
والدنيا بس وياي
صارت حريصه
***
المكفه مكفه اهواي
والممشى ممشاه
خليته بغماس
اشجابه لهنا
***
نعله على ابوه
الوداج للشط تترسين
شيلي الزلف ليفوق
لا يندمر طين
**
رد ياطبيب الجاي
لاتجس نبضي
صدق بعد مشوار
والعمر يكضي
**
تدري شعمل فرقاك
اثر بجبدي
لو عندي ليل انهار
لو تفك عهدي
**
قلبي بعقب فرقاك
ذاب وتسله
والجفن ذنب اجفاك
دمعه يهله
**
خلاني ليل بليل
بالغربه وحدي
بس دمعة الهجران
ظيف على خدي
***
الماتريده الروح
كشمرته بلوه
مثل اليزيح الماي
قوة على علوه
**
إضافات .. أكعد توالي الليل وأذكر وليفي .. وبحجة الحمام ابجي على كيفي ... جيت اشجر التنور .. الوردة طاحت ... هدني يابعد الروح .. حس امي صاحت ..
ردحذف